𑒦𑒰𑒩𑒞𑒧𑒹 𑒯𑒻𑓀𑒛𑒪𑒴𑒧𑒏 𑒃𑒞𑒱𑒯𑒰𑒮 𑒁𑒞𑓂𑒨𑒢𑓂𑒞 𑒣𑓂𑒩𑒰𑒔𑒲𑒢 𑒁𑒕𑒱। 𑒥𑒱𑒯𑒰𑒩 𑒂 𑒫𑒱𑒬𑒹𑒭 𑒩𑒴𑒣𑒮𑒿 𑒧𑒱𑒟𑒱𑒪𑒰𑒧𑒹 𑒫𑒮𑓂𑒞𑓂𑒩 𑒢𑒱𑒩𑓂𑒧𑒰𑒝𑒏 𑒣𑒩𑒧𑓂𑒣𑒩𑒰𑒏𑒹𑒿 𑒥𑒳𑒗𑒥𑒰𑒏 𑒪𑒹𑒪 𑒯𑒧𑒩𑒰 𑒮𑒦𑒏𑒹𑒿 “𑒣𑓂𑒩𑒰𑒔𑒲𑒢 𑒫𑒮𑓂𑒞𑓂𑒩 𑒮𑓀𑒮𑓂𑒏𑒵𑒞𑒱, 𑒧𑒡𑓂𑒨𑒏𑒰𑒪𑒲𑒢 𑒮𑓂𑒟𑒰𑒢𑒲𑒨𑓃 𑒅𑒞𑓂𑒣𑒰𑒠𑒢, 𑒏𑓂𑒭𑒹𑒞𑓂𑒩𑒲𑒨𑓃 𑒫𑓂𑒨𑒰𑒣𑒰𑒩, 𑒎𑒣𑒢𑒱𑒫𑒹𑒬𑒱𑒏 𑒏𑒰𑒪𑒏 𑒣𑓂𑒩𑒦𑒰𑒫 𑒂 𑒮𑓂𑒫𑒞𑓀𑒞𑓂𑒩𑒞𑒰𑒏 𑒥𑒰𑒠𑒏 𑒫𑒱𑒏𑒰𑒮” – 𑒄 𑒮𑒦 𑒣𑒏𑓂𑒭𑒏𑒹𑒿 𑒋𑒏 𑒮𑓀𑒑 𑒠𑒹𑒐𑒢𑒰𑒃 𑒂𑒫𑒬𑓂𑒨𑒏 𑒁𑒕𑒱।
𑒋𑒞𑒨𑓃 𑒄 𑒮𑓂𑒣𑒭𑓂𑒙 𑒏𑒹𑒢𑒰𑒃 𑒂𑒫𑒬𑓂𑒨𑒏 𑒁𑒕𑒱 𑒖𑒹 𑒣𑓂𑒩𑒰𑒔𑒲𑒢 𑒧𑒱𑒟𑒱𑒪𑒰𑒧𑒹 𑒫𑒮𑓂𑒞𑓂𑒩 𑒢𑒱𑒩𑓂𑒧𑒰𑒝𑒏 𑒣𑓂𑒩𑒧𑒰𑒝 𑒂 𑒂𑒃𑒏 𑒁𑒩𑓂𑒟𑒧𑒹 𑒮𑓀𑒑𑒚𑒱𑒞 “𑒯𑒻𑓀𑒛𑒪𑒴𑒧 𑒅𑒠𑓂𑒨𑒼𑒑” 𑒠𑒳𑒢𑒴 𑒁𑒪𑒑-𑒁𑒪𑒑 𑒔𑒲𑒖 𑒁𑒕𑒱। 𑒅𑒣𑒪𑒥𑓂𑒡 𑒌𑒞𑒱𑒯𑒰𑒮𑒱𑒏 𑒣𑓂𑒩𑒧𑒰𑒝𑒏 𑒂𑒡𑒰𑒩𑒣𑒩 𑒄 𑒏𑒯𑒥 𑒅𑒔𑒱𑒞 𑒁𑒕𑒱 𑒖𑒹 𑒧𑒱𑒟𑒱𑒪𑒰 𑒏𑓂𑒭𑒹𑒞𑓂𑒩𑒧𑒹 𑒫𑒮𑓂𑒞𑓂𑒩, 𑒮𑒴𑒞 𑒂 𑒥𑒳𑒢𑒰𑒃𑒏 𑒣𑒩𑒧𑓂𑒣𑒩𑒰 𑒣𑒳𑒩𑒰𑒢 𑒁𑒕𑒱, 𑒧𑒳𑒠𑒰 𑒂𑒃𑒏 𑒏𑒼𑒢𑒼 𑒫𑒱𑒬𑒹𑒭 𑒧𑒱𑒟𑒱𑒪𑒰 𑒯𑒻𑓀𑒛𑒪𑒴𑒧 𑒤𑒻𑒥𑓂𑒩𑒱𑒏𑒏 𑒬𑒳𑒩𑒳𑒂𑒞𑒏 𑒮𑒧𑒨𑓃 𑒏𑒞𑒯𑒳 𑒔𑒱𑒯𑓂𑒢𑒱𑒞 𑒢𑒯𑒱 𑒁𑒕𑒱।
𑒑𑓀𑒑𑒰𑒏 𑒧𑒻𑒠𑒰𑒢𑒲 𑒏𑓂𑒭𑒹𑒞𑓂𑒩𑒮𑒦𑒧𑒹 𑒏𑒣𑒰𑒮, 𑒆𑒢 𑒂 𑒠𑒼𑒮𑒩 𑒩𑒹𑒬𑒰𑒮𑒿 𑒮𑒴𑒞 𑒥𑒢𑒹𑒥𑒰𑒏 𑒂 𑒫𑒮𑓂𑒞𑓂𑒩 𑒞𑒻𑒨𑓃𑒰𑒩 𑒏𑒩𑒥𑒰𑒏 𑒣𑒩𑒧𑓂𑒣𑒩𑒰 𑒩𑒯𑒪 𑒁𑒕𑒱, 𑒖𑒥𑒏𑒱 𑒧𑒱𑒟𑒱𑒪𑒰 𑒮𑒯𑒱𑒞 𑒅𑒞𑓂𑒞𑒩 𑒥𑒱𑒯𑒰𑒩𑒧𑒹 𑒫𑒮𑓂𑒞𑓂𑒩 𑒒𑒩𑒹𑒪𑒴 𑒂 𑒮𑓂𑒟𑒰𑒢𑒲𑒨𑓃 𑒁𑒩𑓂𑒟𑒫𑓂𑒨𑒫𑒮𑓂𑒟𑒰𑒏 𑒯𑒱𑒮𑓂𑒮𑒰 𑒩𑒯𑒪 𑒁𑒕𑒱, 𑒋𑒯𑒱𑒮𑒿 𑒮𑒧𑓂𑒥𑒢𑓂𑒡𑒱𑒞 𑒣𑓂𑒩𑒧𑒰𑒝 𑒮𑒹𑒯𑒼 𑒦𑒹𑒙𑒻𑒞 𑒁𑒕𑒱। 𑒧𑒡𑓂𑒨𑒏𑒰𑒪𑒲𑒢 𑒧𑒱𑒟𑒱𑒪𑒰𑒧𑒹 𑒏𑒵𑒭𑒱𑒏 𑒮𑓀𑒑-𑒮𑓀𑒑 𑒒𑒩𑒹𑒪𑒴 𑒂 𑒮𑓂𑒟𑒰𑒢𑒲𑒨𑓃 𑒏𑒳𑒙𑒲𑒩 𑒑𑒞𑒱𑒫𑒱𑒡𑒱𑒮𑒦𑒏 𑒫𑒱𑒏𑒰𑒮 𑒦𑒹𑒪 𑒂 𑒫𑒮𑓂𑒞𑓂𑒩 𑒢𑒱𑒩𑓂𑒧𑒰𑒝 𑒧𑒳𑒐𑓂𑒨 𑒩𑒴𑒣𑒮𑒿 𑒮𑓂𑒟𑒰𑒢𑒲𑒨𑓃 𑒂𑒫𑒬𑓂𑒨𑒏𑒞𑒰 𑒂 𑒑𑓂𑒩𑒰𑒧𑒲𑒝 𑒁𑒩𑓂𑒟𑒫𑓂𑒨𑒫𑒮𑓂𑒟𑒰𑒮𑒿 𑒖𑒳𑒛𑒪 𑒩𑒯𑒪। 𑒋𑒏𑒩 𑒮𑒧𑓂𑒦𑒰𑒫𑒱𑒞 𑒏𑒰𑒩𑒝 𑒄 𑒦ऽ 𑒮𑒏𑒻𑒞 𑒁𑒕𑒱 𑒖𑒹 𑒧𑒱𑒟𑒱𑒪𑒰𑒧𑒹 𑒫𑒮𑓂𑒞𑓂𑒩 𑒏𑒹𑒫𑒪 𑒣𑒯𑒱𑒩𑒥𑒰𑒏 𑒫𑒮𑓂𑒞𑒳 𑒢𑒯𑒱 𑒕𑒪, 𑒥𑒪𑓂𑒏𑒱 𑒫𑒱𑒫𑒰𑒯, 𑒡𑒰𑒩𑓂𑒧𑒱𑒏 𑒁𑒢𑒳𑒭𑓂𑒚𑒰𑒢, 𑒮𑒰𑒧𑒰𑒖𑒱𑒏 𑒮𑓀𑒮𑓂𑒏𑒰𑒩 𑒂 𑒁𑒢𑓂𑒨 𑒬𑒳𑒦 𑒏𑒰𑒩𑓂𑒨𑒮𑒿 𑒮𑒹𑒯𑒼 𑒖𑒳𑒛𑒪 𑒕𑒪। 𑒡𑒼𑒞𑒲, 𑒮𑒰𑒛𑒲, 𑒔𑒰𑒠𑒩, 𑒑𑒧𑒕𑒰 𑒂𑒠𑒱 𑒫𑒮𑓂𑒞𑓂𑒩𑒏 𑒮𑓂𑒟𑒰𑒢𑒲𑒨𑓃 𑒂𑒫𑒬𑓂𑒨𑒏𑒞𑒰 𑒥𑒢𑒪 𑒩𑒯𑒪।
𑒧𑒱𑒟𑒱𑒪𑒰𑒏 𑒣𑒰𑒩𑒧𑓂𑒣𑒩𑒱𑒏 𑒦𑒱𑒞𑓂𑒞𑒱-𑒔𑒱𑒞𑓂𑒩 𑒏𑒪𑒰, 𑒖𑒹 𑒂𑒃 𑒧𑒡𑒳𑒥𑒢𑒲 𑒁𑒟𑒫𑒰 𑒧𑒱𑒟𑒱𑒪𑒰 𑒣𑒹𑓀𑒙𑒱𑓀𑒑𑒏 𑒢𑒰𑒧𑒮𑒿 𑒖𑒰𑒢𑒪 𑒖𑒰𑒃𑒞 𑒁𑒕𑒱, 𑒥𑒰𑒠𑒏 𑒠𑒱𑒢𑒧𑒹 𑒏𑒣𑒛𑒰 𑒮𑒯𑒱𑒞 𑒫𑒱𑒦𑒱𑒢𑓂𑒢 𑒧𑒰𑒡𑓂𑒨𑒧𑒣𑒩 𑒮𑒹𑒯𑒼 𑒠𑒹𑒐𑒰𑒃 𑒣𑒛𑒪। 𑒠𑒹𑒫𑒲-𑒠𑒹𑒫𑒞𑒰, 𑒫𑒱𑒫𑒰𑒯, 𑒣𑓂𑒩𑒏𑒵𑒞𑒱, 𑒣𑒬𑒳-𑒣𑒏𑓂𑒭𑒲 𑒂 𑒖𑓂𑒨𑒰𑒧𑒱𑒞𑒲𑒨𑓃 𑒂𑒏𑒵𑒞𑒱 𑒋𑒏𑒩 𑒣𑓂𑒩𑒧𑒳𑒐 𑒫𑒱𑒭𑒨𑓃 𑒩𑒯𑒪 𑒁𑒕𑒱। 𑒯𑒰𑒪𑒰𑓀𑒏𑒱 𑒧𑒡𑒳𑒥𑒢𑒲 𑒣𑒹𑓀𑒙𑒱𑓀𑒑 𑒂 𑒯𑒻𑓀𑒛𑒪𑒴𑒧 𑒋𑒏𑓂𑒏𑒯𑒱 𑒔𑒲𑒖 𑒢𑒯𑒱 𑒁𑒕𑒱। 𑒖𑒞𑒨𑓃 𑒧𑒡𑒳𑒥𑒢𑒲 𑒣𑒹𑓀𑒙𑒱𑓀𑒑 𑒋𑒏𑒙𑒰 𑒏𑒪𑒰-𑒣𑒩𑒧𑓂𑒣𑒩𑒰 𑒁𑒕𑒱, 𑒞𑒞𑒨𑓃 𑒯𑒻𑓀𑒛𑒪𑒴𑒧 𑒏𑒩𑒒𑒰𑒣𑒩 𑒡𑒰𑒑𑒰𑒏𑒹𑒿 𑒥𑒳𑒢𑒱 𑒏𑒣𑒛𑒰 𑒥𑒢𑒹𑒥𑒰𑒏 𑒞𑒏𑒢𑒲𑒏 𑒁𑒕𑒱। 𑒂𑒡𑒳𑒢𑒱𑒏 𑒮𑒧𑒨𑓃𑒧𑒹 𑒠𑒳𑒢𑒴 𑒣𑒩𑒧𑓂𑒣𑒩𑒰𑒏 𑒮𑓀𑒨𑓃𑒼𑒖𑒢 𑒦𑒹𑒪 𑒂 𑒯𑒻𑓀𑒛𑒪𑒴𑒧 𑒏𑒣𑒛𑒰𑒣𑒩 𑒧𑒱𑒟𑒱𑒪𑒰/𑒧𑒡𑒳𑒥𑒢𑒲 𑒔𑒱𑒞𑓂𑒩𑒏𑒰𑒩𑒲𑒏 𑒂𑒩𑒧𑓂𑒦 𑒦𑒹𑒪।
𑒦𑒰𑒑𑒪𑒣𑒳𑒩 𑒥𑒱𑒯𑒰𑒩𑒏 𑒮𑒦𑒮𑒿 𑒧𑒯𑒞𑓂𑒫𑒣𑒴𑒩𑓂𑒝 𑒯𑒟𑒏𑒩𑒒𑒰 𑒂 𑒩𑒹𑒬𑒧 𑒏𑒹𑒢𑓂𑒠𑓂𑒩𑒮𑒦𑒧𑒹 𑒮𑒿 𑒋𑒏 𑒁𑒕𑒱 𑒂 𑒋𑒏𑒩𑒰 𑒮𑒱𑒪𑓂𑒏 𑒮𑒱𑒙𑒲𑒏 𑒩𑒴𑒣𑒧𑒹 𑒖𑒰𑒢𑒪 𑒖𑒰𑒃𑒞 𑒩𑒯𑒪 𑒁𑒕𑒱। 𑒋𑒞𑒨𑓃 𑒞𑒮𑒩 𑒮𑒱𑒪𑓂𑒏, 𑒧𑒙𑒏𑒰 𑒮𑒱𑒪𑓂𑒏, 𑒧𑒳𑒪𑒥𑒹𑒩𑒲 𑒮𑒱𑒪𑓂𑒏 𑒞𑒟𑒰 𑒫𑒱𑒦𑒱𑒢𑓂𑒢 𑒣𑓂𑒩𑒏𑒰𑒩𑒏 𑒧𑒱𑒬𑓂𑒩𑒱𑒞 𑒂 𑒮𑒴𑒞𑒲 𑒫𑒮𑓂𑒞𑓂𑒩 𑒥𑒢𑒰𑒍𑒪 𑒖𑒰𑒃𑒞 𑒁𑒕𑒱।
𑒥𑒱𑒯𑒰𑒩 𑒮𑒩𑒏𑒰𑒩𑒏 𑒁𑒢𑒳𑒮𑒰𑒩 𑒩𑒰𑒖𑓂𑒨𑒧𑒹 𑒯𑒻𑓀𑒛𑒪𑒴𑒧 𑒑𑒞𑒱𑒫𑒱𑒡𑒱 𑒁𑒢𑒹𑒏 𑒖𑒱𑒪𑒰𑒧𑒹 𑒤𑒻𑒪𑒪 𑒁𑒕𑒱, 𑒖𑒰𑒯𑒱𑒧𑒹 𑒦𑒰𑒑𑒪𑒣𑒳𑒩, 𑒢𑒰𑒪𑒢𑓂𑒠𑒰, 𑒮𑒲𑒫𑒰𑒢, 𑒧𑒡𑒳𑒥𑒢𑒲 𑒂 𑒮𑒲𑒞𑒰𑒧𑒜𑒲 𑒣𑓂𑒩𑒧𑒳𑒐 𑒁𑒕𑒱। 𑒮𑒩𑒏𑒰𑒩𑒲 𑒂𑒿𑒏𑒛𑒰𑒧𑒹 𑒪𑒑𑒦𑒑 𑓓.𑓖𑓖 𑒪𑒰𑒐 𑒥𑒳𑒢𑒏𑒩 𑒂 𑓗𑓗,𑓐𑓐𑓐 𑒏𑒩𑒒𑒰𑒏 𑒅𑒪𑓂𑒪𑒹𑒐 𑒁𑒕𑒱, 𑒧𑒳𑒠𑒰 𑒫𑓂𑒨𑒫𑒯𑒰𑒩𑒧𑒹 𑒄 𑒂𑒿𑒏𑒛𑒰 𑒫𑒩𑓂𑒞𑒧𑒰𑒢𑒧𑒹 𑒏𑒯𑒰𑒿 𑒡𑒩𑒱 𑒪𑒰𑒑𑒴 𑒁𑒕𑒱, 𑒮𑒹 𑒣𑒞𑒰 𑒢𑒯𑒱।
𑒧𑒱𑒟𑒱𑒪𑒰 𑒏𑓂𑒭𑒹𑒞𑓂𑒩𑒏 𑒥𑒰𑒞 𑒏𑒩𑒲 𑒞ऽ 𑒧𑒡𑒳𑒥𑒢𑒲 𑒏𑓂𑒭𑒹𑒞𑓂𑒩𑒧𑒹 𑒡𑒼𑒞𑒲, 𑒮𑒰𑒛𑒲 𑒂 𑒁𑒢𑓂𑒨 𑒫𑒮𑓂𑒞𑓂𑒩𑒮𑒿 𑒮𑒧𑓂𑒥𑒢𑓂𑒡𑒱𑒞 𑒯𑒻𑓀𑒛𑒪𑒴𑒧 𑒅𑒞𑓂𑒣𑒰𑒠𑒢𑒏 𑒅𑒪𑓂𑒪𑒹𑒐 𑒮𑒩𑒏𑒰𑒩𑒲 𑒠𑒮𑓂𑒞𑒰𑒫𑒹𑒖𑒮𑒦𑒧𑒹 𑒦𑒹𑒙𑒻𑒞 𑒁𑒕𑒱। 𑒋𑒞𑒨𑓃 𑒠𑒴𑒙𑒰 𑒁𑒪𑒑 𑒧𑒳𑒠𑒰 𑒥𑒰𑒠𑒧𑒹 𑒣𑒩𑒮𑓂𑒣𑒩 𑒖𑒳𑒛𑒪 𑒣𑒩𑒧𑓂𑒣𑒩𑒰 𑒠𑒹𑒐𑒰𑒃𑒞 𑒣𑒛𑒻𑒞 𑒁𑒕𑒱 – 𑒏𑒩𑒒𑒰 𑒁𑒩𑓂𑒟𑒰𑒞𑓂 𑒫𑒮𑓂𑒞𑓂𑒩 𑒢𑒱𑒩𑓂𑒧𑒰𑒝 𑒂 𑒧𑒱𑒟𑒱𑒪𑒰 𑒔𑒱𑒞𑓂𑒩𑒏𑒪𑒰 𑒁𑒩𑓂𑒟𑒰𑒞𑓂 𑒏𑒪𑒰 𑒂 𑒂𑒏𑒵𑒞𑒱। 𑒂𑒃𑒏𑒰𑒪𑓂𑒯𑒱 𑒯𑒻𑓀𑒛𑒪𑒴𑒧 𑒂 𑒏𑒪𑒰𑒏𑒹𑒿 𑒖𑒼𑒛𑒱 𑒏ऽ 𑒧𑒱𑒟𑒱𑒪𑒰-𑒟𑒲𑒧 𑒙𑒹𑒏𑓂𑒮𑒙𑒰𑒃𑒪𑒏 𑒔𑒪𑒢 𑒁𑒕𑒱।
𑒥𑒱𑒯𑒰𑒩𑒏 𑒯𑒻𑓀𑒛𑒪𑒴𑒧 𑒏𑓂𑒪𑒮𑓂𑒙𑒩𑒮𑒦𑒧𑒹 𑒣𑒱𑒙 𑒪𑒴𑒧 𑒂 𑒤𑓂𑒩𑒹𑒧 𑒪𑒴𑒧 𑒠𑒳𑒢𑒴 𑒣𑓂𑒩𑒏𑒰𑒩𑒏 𑒏𑒩𑒒𑒰 𑒦𑒹𑒙𑒻𑒞 𑒁𑒕𑒱। 𑒋𑒯𑒱 𑒮𑒦𑒧𑒹 𑒦𑒰𑒑𑒪𑒣𑒳𑒩𑒏 𑒔𑒧𑓂𑒣𑒰𑒢𑒑𑒩𑒧𑒹 𑒮𑒱𑒪𑓂𑒏 𑒤𑒻𑒥𑓂𑒩𑒱𑒏 𑒥𑒢𑒰𑒍𑒪 𑒖𑒰𑒃𑒞 𑒁𑒕𑒱। 𑒋𑒞𑒨𑓃 𑒏𑒞𑒹𑒏𑒼 𑒥𑒳𑒢𑒏𑒩 𑒁𑒪𑒑-𑒁𑒪𑒑 𑒣𑓂𑒩𑒏𑒰𑒩𑒏 𑒙𑒹𑒏𑓂𑒮𑒔𑒩 𑒂 𑒮𑓂𑒙𑓂𑒩𑒏𑓂𑒔𑒩 𑒞𑒻𑒨𑓃𑒰𑒩 𑒏𑒩𑒻𑒞 𑒕𑒟𑒱। 𑒏𑒱𑒕𑒳 𑒮𑓂𑒟𑒰𑒢𑒣𑒩 𑒮𑒱𑒪𑓂𑒏 𑒔𑒰𑒠𑒩, 𑒞𑒮𑓂𑒮𑒩 𑒮𑒱𑒪𑓂𑒏, 𑒡𑒼𑒞𑒲, 𑒪𑒳𑓀𑒑𑒲 𑒂 𑒑𑒧𑒕𑒰 𑒖𑒹𑒏𑒰𑒿 𑒅𑒞𑓂𑒣𑒰𑒠 𑒣𑓂𑒩𑒧𑒳𑒐 𑒩𑒴𑒣𑒮𑒿 𑒥𑒢𑒰𑒍𑒪 𑒖𑒰𑒃𑒞 𑒁𑒕𑒱। 𑒁𑒩𑓂𑒟𑒰𑒞𑓂 𑒯𑒻𑓀𑒛𑒪𑒴𑒧 𑒏𑒹𑒫𑒪 𑒯𑒰𑒟𑒮𑒿 𑒡𑒰𑒑𑒰 𑒛𑒰𑒪𑒥𑒰𑒏 𑒏𑒰𑒖 𑒢𑒯𑒱 𑒁𑒕𑒱, 𑒥𑒪𑓂𑒏𑒱 𑒋𑒏𑒩 𑒣𑒰𑒕𑒰𑒿 𑒫𑒱𑒏𑒮𑒱𑒞 𑒏𑒩𑒒𑒰-𑒞𑒏𑒢𑒲𑒏 𑒂 𑒏𑒳𑒬𑒪 𑒥𑒳𑒢𑒰𑒃𑒏 𑒏𑒾𑒬𑒪 𑒯𑒼𑒃𑒞 𑒁𑒕𑒱।
𑒮𑓂𑒫𑒞𑓀𑒞𑓂𑒩𑒞𑒰𑒏 𑒥𑒰𑒠 𑒯𑒻𑓀𑒛𑒪𑒴𑒧𑒏𑒹𑒿 𑒑𑓂𑒩𑒰𑒧𑒲𑒝 𑒩𑒼𑒖𑒑𑒰𑒩 𑒂 𑒏𑒳𑒙𑒲𑒩 𑒅𑒠𑓂𑒨𑒼𑒑𑒏 𑒩𑒴𑒣𑒧𑒹 𑒫𑒱𑒏𑒮𑒱𑒞 𑒏𑒩𑒥𑒰𑒏 𑒣𑓂𑒩𑒨𑓃𑒰𑒮 𑒦𑒹𑒪। 𑒥𑒱𑒯𑒰𑒩 𑒮𑒩𑒏𑒰𑒩𑒏 𑒛𑒱𑒩𑒹𑒔𑓂𑒞𑒼𑒩𑒞𑒹 𑒍𑒤 𑓁𑒁𑒢𑓂𑒠𑓂𑒪𑒴𑒧 & 𑒭𑒹𑒩𑒱𑒔𑒳𑒪𑓂𑒞𑒳𑒩𑒹 𑒯𑒻𑓀𑒛𑒪𑒴𑒧 𑒂 𑒮𑒱𑒪𑓂𑒏 𑒏𑓂𑒭𑒹𑒞𑓂𑒩𑒏 𑒫𑒱𑒏𑒰𑒮 𑒂 𑒣𑓂𑒩𑒼𑒞𑓂𑒮𑒰𑒯𑒢𑒏 𑒪𑒹𑒪 𑒢𑒼𑒛𑒪 𑒋𑒖𑒹𑓀𑒮𑒲 𑒁𑒕𑒱।
𑒔𑒱𑒞𑓂𑒩 𑒮𑒰𑒦𑒰𑒩 𑒣𑓂𑒩𑒱𑒨𑓃𑒠𑒩𑓂𑒬𑒱 𑒮𑒹𑒪𑓂𑒮
