𑒧𑒱𑒟𑒱𑒪𑒰𑒏 𑒣𑒰𑒫𑒢 𑒧𑒰𑒙𑒲 𑒣𑒩 𑒁𑒢𑒹𑒏𑒾 𑒁𑒪𑒾𑒏𑒱𑒏 𑒂 𑒌𑒞𑒱𑒯𑒰𑒮𑒱𑒏 𑒮𑓂𑒟𑒪 𑒕𑒻𑒟𑒱, 𑒖𑒹 𑒁𑒣𑒢 𑒑𑒩𑓂𑒦 𑒧𑒹𑓀 𑒣𑓂𑒩𑒰𑒔𑒲𑒢 𑒮𑓀𑒮𑓂𑒏𑒵𑒞𑒱, 𑒠𑒩𑓂𑒬𑒢 𑒂 𑒂𑒡𑓂𑒨𑒰𑒞𑓂𑒧 𑒏𑒹 𑒋𑒏𑒙𑒰 𑒣𑒻𑒒 𑒃𑒞𑒱𑒯𑒰𑒮 𑒮𑒧𑒹𑒙𑓂𑒢𑒹 𑒁𑒕𑒱। 𑒋𑒯𑒱 𑒧𑒹𑓀 𑒮𑒿 𑒮𑒯𑒩𑒮𑒰 𑒖𑒱𑒪𑒰𑒏 𑒧𑒯𑒱𑒭𑒲 𑒑𑒰𑒧 𑒮𑓂𑒟𑒱𑒞 𑒧𑒰𑒿 𑒅𑒑𑓂𑒩𑒞𑒰𑒩𑒰 𑒦𑒑𑒫𑒞𑒲𑒏 𑒬𑒏𑓂𑒞𑒱𑒣𑒲𑒚 𑒠𑒹𑒬-𑒫𑒱𑒠𑒹𑒬 𑒏𑒹 𑒦𑒏𑓂𑒞 𑒂 𑒞𑓀𑒞𑓂𑒩 𑒮𑒰𑒡𑒏 𑒪𑒹𑒪 𑒂𑒮𑓂𑒟𑒰𑒏 𑒋𑒏𑒙𑒰 𑒧𑒯𑒰𑒢 𑒏𑒹𑓀𑒠𑓂𑒩 𑒧𑒰𑒢𑒪 𑒖𑒰𑒃𑒞 𑒁𑒕𑒱। 𑒄 𑒣𑒫𑒱𑒞𑓂𑒩 𑒮𑓂𑒟𑒪 𑒏𑒹𑒫𑒪 𑒡𑒰𑒩𑓂𑒧𑒱𑒏 𑒠𑒵𑒭𑓂𑒙𑒱 𑒮𑒿 𑒢𑒻, 𑒥𑒪𑓂𑒏𑒱 𑒦𑒰𑒩𑒞𑒲𑒨𑓃 𑒠𑒩𑓂𑒬𑒢 𑒂 𑒬𑒰𑒮𑓂𑒞𑓂𑒩𑒰𑒩𑓂𑒟 𑒣𑒩𑓀𑒣𑒩𑒰𑒏 𑒮𑒹𑒯𑒼 𑒋𑒏𑒙𑒰 𑒖𑒲𑒫𑓀𑒞 𑒑𑒫𑒰𑒯𑒲 𑒕𑒲।
𑒧𑓀𑒛𑒢 𑒧𑒱𑒬𑓂𑒩 𑒂 𑒂𑒠𑒱𑒑𑒳𑒩𑒳 𑒬𑓀𑒏𑒩𑒰𑒔𑒰𑒩𑓂𑒨𑒏 𑒌𑒞𑒱𑒯𑒰𑒮𑒱𑒏 𑒬𑒰𑒮𑓂𑒞𑓂𑒩𑒰𑒩𑓂𑒟
𑒋𑒯𑒱 𑒣𑒫𑒱𑒞𑓂𑒩 𑒮𑓂𑒟𑒪 𑒏𑒹𑒩 𑒧𑒯𑒱𑒧𑒰 𑒂 𑒧𑒯𑒞𑓂𑒫 𑒋𑒯𑒱 𑒏𑒰𑒩𑒝 𑒮𑒿 𑒂𑒩 𑒥𑒹𑒮𑒲 𑒥𑒜𑒱 𑒖𑒰𑒃𑒞 𑒁𑒕𑒱, 𑒏𑒱𑒋𑒏 𑒞 𑒃𑒋𑒯 𑒍 𑒣𑒰𑒫𑒢 𑒦𑒴𑒧𑒱 𑒁𑒕𑒱 𑒖𑒞𑒨𑓃 𑒧𑒱𑒟𑒱𑒪𑒰𑒏 𑒣𑓂𑒩𑒏𑒰𑓀𑒛 𑒫𑒱𑒠𑓂𑒫𑒰𑒢 𑒧𑓀𑒛𑒢 𑒧𑒱𑒬𑓂𑒩 𑒂 𑒂𑒠𑒱𑒑𑒳𑒩𑒳 𑒬𑓀𑒏𑒩𑒰𑒔𑒰𑒩𑓂𑒨 𑒏𑒹 𑒥𑒲𑒔 𑒌𑒞𑒱𑒯𑒰𑒮𑒱𑒏 𑒬𑒰𑒮𑓂𑒞𑓂𑒩𑒰𑒩𑓂𑒟 𑒦𑒹𑒪 𑒕𑒪। 𑒏𑒱𑓀𑒫𑒠𑓀𑒞𑒲 𑒏𑒹 𑒁𑒢𑒳𑒮𑒰𑒩, 𑒍𑒯𑒱 𑒬𑒰𑒮𑓂𑒞𑓂𑒩𑒰𑒩𑓂𑒟 𑒧𑒹𑓀 𑒣𑒯𑒱𑒢𑒹 𑒬𑓀𑒏𑒩𑒰𑒔𑒰𑒩𑓂𑒨 𑒫𑒱𑒖𑒨𑓃𑒲 𑒩𑒯𑒪𑒰𑒯, 𑒧𑒳𑒠𑒰 𑒥𑒰𑒠 𑒧𑒹𑓀 𑒧𑓀𑒛𑒢 𑒧𑒱𑒬𑓂𑒩 𑒏𑒹 𑒫𑒱𑒠𑒳𑒭𑒲 𑒁𑒩𑓂𑒡𑒰𑓀𑒑𑒱𑒢𑒲 𑒦𑒰𑒩𑒞𑒲 𑒏𑒹 𑒮𑓀𑒑 𑒦𑒹𑒪 𑒬𑒰𑒮𑓂𑒞𑓂𑒩𑒰𑒩𑓂𑒟 𑒧𑒹𑓀 𑒬𑓀𑒏𑒩𑒰𑒔𑒰𑒩𑓂𑒨 𑒏𑒹 𑒣𑒩𑒰𑒖𑒨𑓃 𑒏𑒹 𑒮𑒰𑒧𑒢𑒰 𑒏𑒩𑒨𑓃 𑒣𑒛𑒪 𑒕𑒪। 𑒖𑒢𑒔𑒩𑓂𑒔𑒰 𑒂 𑒪𑒼𑒏-𑒏𑒟𑓂𑒨 𑒁𑒞𑒹𑒏 𑒡𑒩𑒱 𑒣𑓂𑒩𑒮𑒱𑒠𑓂𑒡 𑒁𑒕𑒱 𑒖𑒹 𑒬𑒰𑒮𑓂𑒞𑓂𑒩𑒰𑒩𑓂𑒟 𑒋𑒞𑒹𑒏 𑒠𑒲𑒩𑓂𑒒 𑒏𑒰𑒪 𑒂 𑒮𑒴𑒏𑓂𑒭𑓂𑒧𑒞𑒰 𑒮𑒿 𑒦𑒹𑒪 𑒕𑒪 𑒖𑒹 𑒍𑒯𑒱 𑒚𑒰𑒧𑒏 𑒔𑒱𑒩𑒃-𑒔𑒳𑒢𑒧𑒳𑒢𑓂𑒢𑒲 (𑒣𑒏𑓂𑒭𑒲) 𑒮𑒥 𑒡𑒩𑒱 𑒮𑓀𑒮𑓂𑒏𑒵𑒞 𑒬𑓂𑒪𑒼𑒏 𑒥𑒖𑒻𑒞 𑒕𑒹𑒪𑒻𑒯। 𑒮𑒯𑒩𑒮𑒰 𑒧𑒳𑒐𑓂𑒨𑒰𑒪𑒨𑓃 𑒮𑒿 𑒧𑒰𑒞𑓂𑒩 𑒮𑒼𑒩𑒯 𑒏𑒱𑒪𑒼𑒧𑒲𑒙𑒩 𑒠𑒴𑒩 𑒮𑓂𑒟𑒱𑒞 𑒧𑒯𑒱𑒭𑒲 𑒑𑒰𑒧 𑒧𑒹𑓀 𑒁𑒫𑒮𑓂𑒟𑒱𑒞 𑒋𑒯𑒱 𑒧𑓀𑒠𑒱𑒩 𑒧𑒹𑓀 𑒮𑒰𑒪 𑒦𑒩𑒱 𑒦𑒏𑓂𑒞𑒏 𑒦𑒰𑒩𑒲 𑒦𑒲𑒛 𑒖𑒧𑒰 𑒩𑒯𑒻𑒞 𑒁𑒕𑒱।
𑒧𑒰𑒞𑒰 𑒮𑒞𑒲𑒏 𑒫𑒰𑒧 𑒢𑒹𑒞𑓂𑒩 𑒂 𑒣𑒾𑒩𑒰𑒝𑒱𑒏 𑒧𑒰𑒢𑓂𑒨𑒞𑒰
𑒬𑒏𑓂𑒞𑒱 𑒣𑒳𑒩𑒰𑒝 𑒏𑒹 𑒁𑒢𑒳𑒮𑒰𑒩, 𑒖𑒐𑒢 𑒦𑒑𑒫𑒰𑒢 𑒬𑒱𑒫 𑒧𑒰𑒞𑒰 𑒮𑒞𑒲 𑒏𑒹 𑒧𑒵𑒞 𑒬𑒩𑒲𑒩 𑒏𑒹 𑒏𑒰𑒿𑒡 𑒣𑒩 𑒅𑒚𑒰 𑒏ऽ 𑒫𑒱𑒏𑓂𑒭𑒱𑒣𑓂𑒞 𑒖𑒏𑒰𑒿 𑒒𑒳𑒧𑒱 𑒩𑒯𑒪 𑒕𑒪𑒰𑒯, 𑒞 𑒣𑓂𑒩𑒪𑒨𑓃 𑒏𑒹 𑒦𑒨𑓃 𑒮𑒿 𑒦𑒑𑒫𑒰𑒢 𑒫𑒱𑒭𑓂𑒝𑒳 𑒁𑒣𑒢 𑒮𑒳𑒠𑒩𑓂𑒬𑒢 𑒔𑒏𑓂𑒩 𑒮𑒿 𑒮𑒞𑒲 𑒏𑒹 𑒬𑒩𑒲𑒩 𑒏𑒹 𑒥𑒰𑒫𑒢 𑒦𑒰𑒑 𑒧𑒹𑓀 𑒏𑒰𑒙𑒱 𑒏ऽ 𑒁𑒪𑒑 𑒏ऽ 𑒠𑒹𑒢𑒹 𑒕𑒪𑒰𑒯। 𑒣𑒵𑒟𑓂𑒫𑒲 𑒣𑒩 𑒖𑒞𑒨𑓃-𑒖𑒞𑒨𑓃 𑒍 𑒦𑒰𑒑 𑒐𑒮𑒪, 𑒮𑒹 𑒮𑒥 𑒮𑒱𑒠𑓂𑒡𑒣𑒲𑒚 𑒏𑒹 𑒩𑒴𑒣 𑒧𑒹𑓀 𑒫𑒱𑒐𑓂𑒨𑒰𑒞 𑒦𑒹𑒪। 𑒋𑒯𑒢 𑒧𑒰𑒢𑓂𑒨𑒞𑒰 𑒁𑒕𑒱 𑒖𑒹 𑒧𑒯𑒱𑒭𑒲 𑒏𑒹 𑒅𑒑𑓂𑒩𑒞𑒰𑒩𑒰 𑒮𑓂𑒟𑒰𑒢 𑒣𑒩 𑒧𑒰𑒞𑒰 𑒮𑒞𑒲 𑒏𑒹 𑒫𑒰𑒧 𑒢𑒹𑒞𑓂𑒩 𑒐𑒮𑒪 𑒕𑒪𑒻𑒢𑓂𑒯।
𑒋𑒏𑒙𑒰 𑒁𑒢𑓂𑒨 𑒣𑒾𑒩𑒰𑒝𑒱𑒏 𑒧𑒰𑒢𑓂𑒨𑒞𑒰 𑒏𑒹 𑒁𑒢𑒳𑒮𑒰𑒩, 𑒧𑒯𑒩𑓂𑒭𑒱 𑒫𑒬𑒱𑒭𑓂𑒚 𑒏𑒹 𑒏𑒚𑒱𑒢 𑒅𑒑𑓂𑒩 𑒞𑒣𑒮𑓂𑒨𑒰 𑒮𑒿 𑒣𑓂𑒩𑒮𑒢𑓂𑒢 𑒦ऽ 𑒏ऽ 𑒦𑒑𑒫𑒞𑒲 𑒋𑒯𑒱 𑒚𑒰𑒧 𑒣𑓂𑒩𑒏𑒙 𑒦𑒹𑒪𑒲𑒯, 𑒖𑒰𑒯𑒱 𑒏𑒰𑒩𑒝 𑒃𑒢𑒏𑒰 ऽ𑒫𑒬𑒱𑒭𑓂𑒚 𑒂𑒩𑒰𑒡𑒱𑒞𑒰ऽ 𑒩𑒴𑒣 𑒧𑒹𑓀 ऽ𑒅𑒑𑓂𑒩𑒞𑒰𑒩𑒰ऽ 𑒏𑒯𑒪 𑒑𑒹𑒪। 𑒧𑒰𑒿 𑒅𑒑𑓂𑒩𑒞𑒰𑒩𑒰 𑒏𑒹 𑒢𑒰𑒧 𑒏𑒹 𑒣𑒰𑒕𑒴 𑒋𑒏𑒙𑒰 𑒂𑒩 𑒧𑒰𑒢𑓂𑒨𑒞𑒰 𑒃𑒯𑒼 𑒁𑒕𑒱 𑒖𑒹 𑒧𑒰𑒿 𑒁𑒣𑒢 𑒢𑒰𑒧 𑒁𑒢𑒳𑒩𑒴𑒣 ऽ𑒅𑒑𑓂𑒩ऽ 𑒩𑒴𑒣 𑒡𑒋 𑒏ऽ 𑒦𑒏𑓂𑒞𑒏 𑒁𑒞𑒱 𑒑𑓀𑒦𑒲𑒩 𑒮𑒿 𑒑𑓀𑒦𑒲𑒩 𑒥𑒲𑒧𑒰𑒩𑒲 𑒏𑒹 𑒋𑒏 𑒏𑓂𑒭𑒝 𑒧𑒹𑓀 𑒮𑒧𑒰𑒣𑓂𑒞 𑒏ऽ 𑒠𑒻𑒞 𑒕𑒟𑒱। 𑒧𑒰𑒿 𑒅𑒑𑓂𑒩𑒞𑒰𑒩𑒰 𑒏𑒹 𑒋𑒏𑒙𑒰 𑒥𑒛 𑒫𑒱𑒬𑒹𑒭𑒞𑒰 𑒃𑒯𑒼 𑒕𑒢𑓂𑒯𑒱 𑒖𑒹 𑒧𑒰𑒿 𑒁𑒣𑒢 𑒦𑒏𑓂𑒞 𑒏𑒹 𑒠𑒱𑒢𑒦𑒩𑒱 𑒧𑒹𑓀 𑒞𑒲𑒢𑒙𑒰 𑒁𑒪𑒑-𑒁𑒪𑒑 𑒮𑓂𑒫𑒩𑒴𑒣—𑒅𑒑𑓂𑒩𑒞𑒰𑒩𑒰, 𑒢𑒲𑒪 𑒮𑒩𑒮𑓂𑒫𑒞𑒲 𑒂 𑒋𑒏𑒖𑒙𑒰—𑒧𑒹𑓀 𑒠𑒩𑓂𑒬𑒢 𑒠𑒻𑒞 𑒕𑒟𑒱।
𑒞𑓀𑒞𑓂𑒩 𑒮𑒰𑒡𑒢𑒰 𑒏𑒹𑒩 𑒏𑒹𑓀𑒠𑓂𑒩 𑒂 𑒌𑒞𑒱𑒯𑒰𑒮𑒱𑒏 𑒧𑓀𑒠𑒱𑒩
𑒞𑓀𑒞𑓂𑒩 𑒮𑒰𑒡𑒢𑒰 𑒏𑒹 𑒪𑒹𑒪 𑒅𑒑𑓂𑒩𑒞𑒰𑒩𑒰 𑒧𑒯𑒱𑒭𑒲 𑒏𑒹 𑒮𑓂𑒟𑒰𑒢𑒏𑒹 𑒮𑒦 𑒮𑒿 𑒫𑒱𑒬𑒱𑒭𑓂𑒙 𑒂 𑒣𑒫𑒱𑒞𑓂𑒩 𑒧𑒰𑒢𑒪 𑒖𑒰𑒃𑒞 𑒁𑒕𑒱। 𑒫𑒱𑒬𑒹𑒭𑒏𑒟𑒱 𑒬𑒰𑒩𑒠𑒲𑒨𑓃 𑒢𑒫𑒩𑒰𑒞𑓂𑒩 𑒧𑒹𑓀 𑒧𑒯𑒰𑒭𑓂𑒙𑒧𑒲 𑒏𑒹 𑒠𑒱𑒢 𑒋𑒯𑒱𑒚𑒰𑒧 𑒠𑒹𑒬-𑒏𑒼𑒢𑒰 𑒮𑒿 𑒞𑓀𑒞𑓂𑒩 𑒮𑒰𑒡𑒏𑒏 𑒯𑒳𑒖𑒴𑒧 𑒪𑒰𑒑𑒪 𑒩𑒯𑒻𑒞 𑒕𑒻𑒏। 𑒥𑒱𑒯𑒰𑒩 𑒏𑒹 𑒁𑒞𑒱𑒩𑒱𑒏𑓂𑒞 𑒣𑒬𑓂𑒔𑒱𑒧 𑒥𑓀𑒑𑒰𑒪 𑒂 𑒢𑒹𑒣𑒰𑒪 𑒡𑒩𑒱 𑒏𑒹 𑒞𑒰𑓀𑒞𑓂𑒩𑒱𑒏 𑒂 𑒬𑓂𑒩𑒠𑓂𑒡𑒰𑒪𑒳 𑒪𑒼𑒏𑒢𑒱 𑒦𑒩𑒱 𑒮𑒰𑒪 𑒧𑒰𑒞𑒰𑒏 𑒠𑒩𑒥𑒰𑒩 𑒧𑒹𑓀 𑒯𑒰𑒖𑒱𑒩𑒲 𑒪𑒑𑒫𑒻𑒞 𑒕𑒻𑒟𑒱।
𑒃𑒞𑒱𑒯𑒰𑒮𑒏 𑒣𑒢𑓂𑒢𑒰 𑒣𑒪𑒙𑒻𑒞 𑒕𑒲 𑒞 𑒣𑒞𑒰 𑒔𑒪𑒻𑒞 𑒁𑒕𑒱 𑒖𑒹 𑒋𑒯𑒱 𑒧𑒢𑓂𑒠𑒱𑒩𑒏 𑒫𑒩𑓂𑒞𑒧𑒰𑒢 𑒮𑓂𑒫𑒩𑒴𑒣𑒏 𑒢𑒱𑒩𑓂𑒧𑒰𑒝 𑓑𑓗𑓓𑓕 𑒄𑒮𑓂𑒫𑒲 𑒧𑒹𑓀 𑒩𑒰𑒢𑒲 𑒣𑒠𑓂𑒧𑒰𑒫𑒞𑒲 𑒠𑓂𑒫𑒰𑒩𑒰 𑒏𑒩𑒰𑒍𑒪 𑒑𑒹𑒪 𑒩𑒯𑒻𑒞 𑒁𑒕𑒱। 𑒋𑒯𑒱 𑒣𑒰𑒫𑒢 𑒣𑒲𑒚 𑒣𑒩 𑒣𑒴𑒖𑒰-𑒣𑒰𑒚 𑒁𑒞𑓂𑒨𑓀𑒞 𑒏𑒚𑒼𑒩 𑒬𑒰𑒮𑓂𑒞𑓂𑒩𑒲𑒨𑓃 𑒫𑒱𑒡𑒱 𑒮𑒿 𑒮𑓀𑒣𑒢𑓂𑒢 𑒯𑒼𑒃𑒞 𑒁𑒕𑒱। 𑒬𑓂𑒩𑒠𑓂𑒡𑒰𑒪𑒳𑒑𑒝 𑒮𑒹𑒯𑒼 𑒁𑒞𑓂𑒨𑓀𑒞 𑒞𑒢𑓂𑒧𑒨𑓃𑒞𑒰 𑒂 𑒢𑒱𑒭𑓂𑒚𑒰 𑒮𑒿 𑒞𑓀𑒞𑓂𑒩𑒼𑒏𑓂𑒞 𑒫𑒱𑒡𑒱 𑒮𑒿 𑒯𑒼𑒧𑒨𑓃 𑒥𑒪𑒰 𑒣𑒴𑒖𑒰 𑒧𑒹𑓀 𑒥𑒜𑒱-𑒔𑒜𑒱 𑒏ऽ 𑒦𑒰𑒑 𑒪𑒻𑒞 𑒕𑒻𑒟𑒱 𑒞𑒟𑒰 𑒮𑓀𑒡𑓂𑒨𑒰𑒏𑒰𑒪 𑒧𑒹𑓀 𑒧𑒰𑒞𑒰 𑒏𑒹𑒩 𑒦𑒫𑓂𑒨 𑒂𑒩𑒞𑒲 𑒧𑒹𑓀 𑒬𑒰𑒧𑒱𑒪 𑒦ऽ 𑒏ऽ 𑒁𑒣𑒢𑒹 𑒂𑒣𑒏𑒼 𑒡𑒢𑓂𑒨 𑒧𑒯𑒮𑒴𑒮 𑒏𑒩𑒻𑒞 𑒕𑒻𑒟𑒱।
𑒖𑒨𑓃 𑒧𑒰𑒿 𑒅𑒑𑓂𑒩𑒞𑒰𑒩𑒰!
